Faktanews.co.id.-Wates wilayah Kabupaten Bondowoso lan Kabupaten Banyuwangi reng antarane Gunung Ijen wes rampung.
Rong Kabupaten hang ono reng wilayah eks karesidenan Besuki nyepakati perkoro wates hang semene lawase dadi perkoro.
Sak durunge iki pertemuan mbahas wates wilayah antar kabupaten hang wes dadi masalah sakat 2007 iku wes bolak balek tapi heng tuntas.
Karo-karone kabupaten podo-podo ngakoni teritorial wisata alam Kawah Ijen.
Koresponden media iki ngabaraken klaim soal wates iku wes mari sak uwise Kementerian Dalam Negeri masilitasi pertemuan rong kepala daerah iku.
Ketemuan Rong pemerintahan Kabupaten (Banyuwangi lan Bondowoso) iku dipimpin Plh Sekretaris Daerah Provinsi Jawa Timur, Heru Tjahjono,Kamis (3/6/21).
Pertemuan iku kaitane pelaksanaan ketentuan PP 43 tahun 2021 iku ugo dihadiri tim penegasan wates daerah, Plt Asisten 1 Wawan Setiawan.
Bupati Bondowoso Salwa Arifin ugo ngakui bedo pandangan soal wates-wates wes disepakati.
Kesekapatan hang dikarepaken iku koyo wates reng antarane Gunung Raung, reng antarane Gunung Rante, reng antarane Kawah Ijen lan reng antarane Gunung Ringgit.
Iki asile teko telung pertemuan, dokumen wates wes rampong disepakati Bondowoso lan Banyuwangi.
“Seseh kulon pinggiran Kawah Ijen sebelah kulon iku wilayah Kabupaten Bondowoso. Sedeng, seseh wetan Kawah Ijen iku wilayah Kabupaten Banyuwangi,” jarene, Jumat (4/6/21).
Teko pertemuan itu, ugo ngasilaken tegese wates daerah antarane rong Kabupaten khususe sub segmen reng ndowor perairan kawah Ijen.
Lan engko arep ono dokumen perbatasan anyar hang dipastekaken kelawan Peraturan Menteri Dalam Negeri (Permendagri).
Mergo iku, engko Bondowoso biso milu ngelola wisata Kawah Ijen.
“Siap megawe bareng ambi Kabupaten Banyuwangi majokaken pariwisata reng Kawah Ijen,(Siap untuk bekerjasama dengan Kabupaten Banyuwangi memajukan pariwisata di Kawah Ijen),” jarene.
Koyok hang wes diwerui bareng-bareng, Kawah Ijen iku kawah hang ono reng Gunung Ijen kelawan daya tarik pemandangane hang apik.
Kawah gunung Ijen wujude koyo danau hang seru apike.
Ono reng panggonan hang duwure 2.386 mdpl, dikelilingi kabut lan welek belerang, Wisata Kawah ijen dikenal salah sijine geowisata potensial Kabupaten Banyuwangi.
Pemandangan eksotis ‘Api Biru’, (blue fire) reng tengah wengi marai Kawah Ijen dadi koyo sembrani hang narik wisatawan domestik lan mancanegara.(*kor/suy/mo/kin).
