Candu Utowo Narkotika

Maret 1839 ring Kanton, negoro Cino Kaisar merintah ngobong èwonan peti candu duwèné Inggris.

Mergo gara-gara candu hang diselundupaken Inggris ring negoro Cino mulai abad 19 iku, uripé rakyat Cino séng karu-karuan.

Masa depan peteng dedet koyo mendung, Kaisar sepakat ngilangaken Candu.

Moral kebelundung sampèk ngisor lemah. Wong orép seng mejaji lan seng ono ajiné.

Iku sebabé ulan Maret 182 taun kepungkur pecah perang gedi-gedian 3 taun suwéné.

Asilé Inggris menang lan Cino dèdèl duwèl, kalah.

Mulai iku perdagangan candu tambah bebas lan rakyat urip gandèng rèntèng lan ketagihan candu.

Uripé tambah seng karu-karuan. Cino ngelakoni masa paling apes lan uripé ambles, ngenes. Kololonialisme Inggris koyo setan alas nono wates nguasai Cino…

Iku cerito lawas hang saiki dadi lembaran lungset sejarah negoro Cino, hang kenèng dadi pengiing-iling gok candu utowo narkotika iku senjata pemusnah masal.

Terus kelendi saiki ring taun 2021 iki ? Hang jelas saiki Cino wes bangkit, sopo-sopo ketemon nganggô candu/narkoba ning kono dihukum mati.

Dino iki kadung riko takon negoro hang Pertumbuhan ekonomi paling apik sak dunyo yo negoro Cino.

Terus kelendi ring Indonesia, utamane ring Banyuwangi ?

Iki berita saiki hang seng enak dirungokaken kôpéng dulur, jare ring Banyuwangi kasus pidana hang paling akèh iku perkoro penyalah gunaan Narkotika lan pil trex.

Jelas iku kabèh magé dulur-dulurané candu. Akibaté jelas parah kanggô rakyat lan laré nom-noman ring kuto Banyuwangi iki.

Kepinginé bongso iki maju ring sekabèhé, mulai teko olahraga, kesenian, ilmu pengetahuan ugo maju ring pembangunané.

Tapi kadung rakyat, utamané laré nom-nomané magé ubreg ambi mabuk-mabukan, tèlèr, ngepil lan wés tau tilik ambi hang aran narkotika sak kanca-kancané … ? Yo nono wés dulur, Ajur mumur pokoké wéh…

Ojo cacak diarep-arep bongso iki maju, hang jelas héng pati jelas mbésuk dadi paran negoro iki.

Mergo lare nom podo teler sing gelem sinau utowo ngangsu kaweruh ring sekolah/wong hang lebih ngerti.

Paran maning gelem nganakaken penelitian kanggô pengembangan asèt lan paran-paran hang dadi kearifan lokal hang perlu dilestarikaken lan dikembangno ring deso/kuthoné.

Nah, Iki kabéh mau cerito hang kenèng didadèkaken côntô.

Kedadèan hang dialami negoro Cino hang sagah koyo gedigu nyatané tau gebelundung mergo paran, mergo candu iku muko, kadung ngomong coro saiki narkotika.

Iku penyebab utama negoro Cino kalah lan dijajah ambi Inggris. Amit-amit mugo-mugo ojo sampèk Indonesia, utamane Banyuwangi dijajah Narkotika.

Ayo bareng poďo ngawasi keluargane ďèwèk-ďèwèk.

Hang duwé anak magé enom diawasi metunè nong ndi, sampèk jam piro, konconé sopo baen.

Kudu jelas kabeh, pokok ojo sampek kecolongan.

Cerewe-cerewet sitik yoro seng paran-paran kan dulur ?…Kelendi menurut riko…..

(Momo)